Í gær var það staðfest að landsliðsmaðurinn Ragnar Sigurðsson væri kominn í nýtt lið í Rússlandi. Hann samdi við Rostov og er þriðji Íslendingurinn í herbúðum félagsins.
Þá verður þetta þriðja rússneska félagið sem Ragnar, sem er 31 árs, spilar fyrir.
Hann gerði samning út tímabilið en segir í samtali við mbl vera opinn fyrir því að vera lengur.
„Það er ekki hægt svara því núna en miðað við fyrstu kynnin af félaginu þá býst ég við því að vera opinn fyrir því eftir tímabilið en ég mun bara að skoða þessi mál þegar að því kemur. Fyrst og fremst ætla ég að koma mér í toppstand og reyna að hjálpa liðinu við að rjúka upp töfluna," segir Ragnar en Rostov er í níunda sæti.
Hér að neðan má sjá myndband frá fyrsta vinnudegi Ragnars hjá Rostov. Þegar tekið var á móti honum á flugvellinum og hann mætti á sína fyrstu æfingu hjá félaginu. Þá er viðtal við hann þar sem hann er „döbbaður" skemmtilega á rússnesku.
Hér má sjá svipað myndband sem Rostov birti þegar Björn Bergmann Sigurðarson gekk í raðir félagsins í byrjun mánaðarins.
Athugasemdir