Stórslag Manchester City og Liverpool var að ljúka með 1-1 jafntefli eftir gríðarlega spennandi 90 mínútur þar sem leikmenn virtust á köflum vera að keppast við að klúðra auðveldum færum.

Furðuleg dómgæsla Michael Oliver setti einnig svip sinn á leikinn, en hann tók margar umdeildar ákvarðanir.

James Milner kom Liverpool yfir með marki úr vítaspyrnu snemma í síðari hálfleik eftir umdeildan vítaspyrnudóm. Sergio Aguero jafnaði tæplega 20 mínútum síðar eftir glæsilega stoðsendingu frá Kevin De Bruyne.

Leikurinn var galopinn og skiptust liðin á að sækja. Bæði lið fengu frábær færi sem einhvern veginn fóru forgörðum. De Bruyne skaut í stöng úr fimm metra færi áður en Adam Lallana hitti ekki boltann í dauðafæri á hinum endanum.

Jafnteflið er sanngjarnt og eitt stig skilur liðin að í þriðja og fjórða sæti deildarinnar.