Ítalska meistaraliðið Juventus hélt sigurgöngu sinni á Juventus Stadium áfram í kvöld er liðið sigraði Bologna með einu marki gegn engu.

Liðið var með mikla yfirburði í leiknum og hélt bolta töluvert meira en Bologna en eftir nokkrar tilraunir uppskar meistaraliðið sigurmark á 64. mínútu.

Franski miðjumaðurinn Paul Pogba skoraði það en hann lét þá vaða á markið með hægri í fjærhornið.

Lokatölur því 1-0 Juventus í vil en þetta var sautjándi sigurleikur liðsins í röð á heimavelli eins og áður kom fram.

Liðið er nú með 90 stig á toppnum þegar fjórar umferðir eru eftir en Roma, sem er að spila í augnablikinu er með 80 stig í öðru sæti.