„Þetta var vel útfærður leikur af okkar hálfu, sérstaklega varnarlega. Við gerðum akkúrat það sem við ætluðum að gera. Það er gaman að skoða klippur úr leiknum og sjá hvað við gerðum mikið rétt," segir Birkir Már Sævarsson landsliðsmaður um Argentínuleikinn.
Í aðdraganda leiksins talaði Birkir um að það væri ekkert að gera hann stressaðan að vera að fara að mæta Lionel Messi, einum besta fótboltamanni sögunnar.
Í aðdraganda leiksins talaði Birkir um að það væri ekkert að gera hann stressaðan að vera að fara að mæta Lionel Messi, einum besta fótboltamanni sögunnar.
„Maður getur ekki verið hræddur fyrir fótboltaleiki. Þetta er bara áskorun og gaman að mæta þeim bestu. Við sýndum að við getum það alveg á góðum degi."
Viðbrögðin hafa verið rosaleg eftir úrslitin og fjölmargir tjáð sig um þau.
„Það eru margir búnir að hafa samband og maður hefur lesið mikið af fréttum. Það er stútfullt af fréttum um Ísland út um allt. Maður kíkir á fréttirnar heima og svo skoða ég líka fréttirnar frá þeim stöðum sem ég hef búið á. Það er mikið fjallað um Ísland," segir Birkir.
„Þetta var sögulegur leikur og geggjað að fá að taka þátt í honum."
Eiginkona Birkis var meðal áhorfenda á leiknum og móðir hans einnig.
„Konan og mamma voru mætt. Börnin fengu að vera heima. Þær mæta á næsta leik líka. Það er gott að þær ákváðu að mæta," segir Birkir sem tjáði sig svo um komandi leik, viðureignina gegn Nígeríu á föstudag.
„Þetta verður aðeins öðruvísi leikur. Ég býst ekki við svona rólegheitar-spili fyrir utan boxið hjá okkur, það verður meira keyrt á okkur. Nígeríumenn eru beinskeyttari."
Sjáðu viðtalið í heild í sjónvarpinu hér að ofan.
Athugasemdir