Selfoss komst yfir en Leiknir jafnaði með umdeildu marki þar sem erfitt var að sjá hvort boltinn hefði farið inn.

„Við erum langt frá þessu og getum ekki dæmt um það. Það er þó frekar ólíklegt að boltinn sé inni þegar hann fer í stöngina og slána og svo út. Mér finnst það mjög hæpið en við getum ekki dæmt um það," sagði Gunnar Guðmundsson, þjálfari Selfoss.

Leiknir komst svo yfir úr vítaspyrnu. „Ég var mjög ósáttur við þann dóm. Ég er sannfærður um að þetta var ekki víti. Ég ræddi þetta við Geir (Kristinsson sem dæmdur var brotlegur) og það var klárt mál af hans hálfu að þetta var ekki víti."

Einum færri náði Selfoss að jafna 2-2 og sýndi mikla baráttu til að landa þessu stigi.

„Ég er gríðarlega ánægður með baráttuna í liðinu. Allir strákarnir voru frábærir. Með því að breyta skipulaginu náðum við jöfnunarmarki og svo snéri þetta um að múra fyrir markið og halda jafnri stöðu."

Viðtalið má sjá í heild sinni í sjónvarpinu hér að ofan.