Ingibjörg og Sif á æfingu í gær
„Það er skemmtilegt að hitta allar og komast aftur í gírinn. Við erum búnar að hafa það gott. Þetta er fínt hótel, við erum búnar að æfa á góðum æfingavöllum og það hefur gengið vel,“ sagði landsliðskonan Ingibjörg Sigurðardóttir í samtali við Fótbolta.net síðdegis í gær. Ingibjörg er í landsliðshópnum sem mætir Þýskalandi í undankeppni HM á morgun og Tékkum eftir helgi. Hún segir íslenska liðið leggja mikið kapp á að vera vel undirbúið leikfræðilega þegar kemur að rimmunni við Þjóðverja.
„Þetta snýst mikið um að stilla okkar taktík miðað við þennan leik. Þær eru náttúrulega með ótrúlega gott lið og við þurfum að vera í toppstandi ef við ætlum að fá það sem við viljum út úr leiknum.“
Eftir að keppni lauk heima á Íslandi fór Ingibjörg til Noregs þar sem hún æfði með Valerenga og gat þannig haldið sér í góðu formi. Hún segir það hafa verið lærdómsríkt og getur vel hugsað sér að spila í slíku umhverfi í framtíðinni.
„Við Sísí fórum til Gunnhildar og æfðum með henni og liðinu hennar. Það var fínt að prófa eitthvað nýtt og læra aðeins inn á þetta.“
Voru aðstæður öðruvísi en á Íslandi?
„Þetta eru náttúrulega atvinnumenn sem æfa þarna með henni og það var gaman að sjá hvernig hún æfir. Það er engin tilviljun að hún er í þessu formi. Hún æfir eins og brjálæðingur og maður lærir mikið af henni.“
Aðspurð um það hvort þessir stóru landsleikir sem framundan eru séu ekki fínir sýningargluggar fyrir unga og efnilega leikmenn svaraði Ingibjörg:
„Jú, ég myndi halda það en það er fyrst og fremst mikilvægt að liðið standi sig vel og nái stigum út úr þessum leikjum.“
Nánar er rætt við Ingibjörgu í sjónvarpinu hér að ofan.
Athugasemdir
