Þá er þýska Bundesligan ein allra sterkasta deild heims en sem dæmi eru þýsk félagslið þau sigursælustu í Meistaradeild Evrópu. Fjögur þýsk lið, Frankfurt, Turbine Potsdam, Duisburg og Wolfsburg hafa hampað titlinum sem hefur farið níu sinnum til Þýskalands.

Fimm leikmenn sem eru í íslenska hópnum sem mætir Þýskalandi á morgun hafa leikið í Þýskalandi. Það eru þær Sara Björk Gunnarsdóttir sem spilar með Wolfsburg, Sandra María Jessen sem lék 8 leiki með Bayer Leverkusen árið 2016, Dagný Brynjarsdóttir sem lék með Bayern Munich árið 2015, Sif Atladóttir lék með Saarbrücken 2010-2011 og Guðbjörg Gunnarsdóttir með Turbine Potsdam 2014. Þá lék Margrét Lára Viðarsdóttir bæði með Duisburg og Potsdam en hún er enn að jafna sig af krossbandaslitum og verður ekki með landsliðinu á þessu ári.

Þrír íslenskir leikmenn hafa náð því mikla afreki að verða Þýskalandsmeistarar. Fyrst var það Margrét Lára sem varð meistari með Potsdam vorið 2012. Þá varð Dagný Brynjarsdóttir meistari með Bayern fyrir tveimur árum og Sara Björk vann svo tvöfalt með Wolfsburg í vor.