„Það er búið að senda tvö tilboð og við erum búnir að senda móttilboð. Við erum að ræða málin," sagði Eysteinn Pétur Lárusson framkvæmdastjóri Breiðabliks við Fótbolta.net í dag.

„Í raun og veru ber ekki langt á milli en við erum ekki að láta okkar bestu menn fara fyrir klink . Við erum að henda þessu á milli okkar og það þarf gott tilboð til að við látum Höskuld fara."

Hinn 21 árs gamli Höskuldur sló í gegn með Breiðabliki í Pepsi-deildinni í sumar en hann skoraði sex mörk í tuttugu leikjum.

Landsliðsmennirnir Ögmundur Kristinsson og Birkir Már Sævarsson eru báðir á mála hjá Hammarby.

Liðið sigldi lygnan sjó í sænsku úrvalsdeildinni á nýliðnu tímabili og endaði í ellefta sæti af sextán liðum.