Þór og Magni léku í blíðskaparveðri (innanhúss) fyrir fullu húsi, á að giska um 320 manns, í gærkvöldi. Bæði lið leika í Inkasso-deildinni á komandi sumri en Magnamenn eru þar nýliðar.

Þórsarar byrjuðu leikinn af krafti og þurfti Steinþór Már að taka á honum stóra sínum strax á annarri mínútu leiksins er hann varði vel frá Ármanni Pétri. Á sjöttu mínútu átti Kelvin Sarkor (til reynslu) flotta sendingu sem Steinþór Már greip rétt áður en Sveinn Elías komst í hann. Á áttundu mínútu á Bjarki Þór Viðarsson (nýkominn frá KA) frábæra sendingu fyrir mark Magna þar sem Ármann Pétur stakk sér fram fyrir varnarmann Þórs og stangaði boltann í netið.

Eftir markið róaðist leikurinn um stund, Magnamenn fengu ágætis færi á að jafna leikinn á tuttugustu mínútu en Gunnar Örvar skaut rétt framhjá eftir fína sendingu frá Arnari Geir. Magnamenn æsast aðeins við þetta og fá aukaspyrnu á 22. mínútu sem Sigurður Marinó tekur en Þórsarar ná að hreinsa frá marki. Á 33. mínútu átti Jakob Hafsteinsson skot rétt framhjá Þórsmarkinu en svo róaðist leikurinn fram að hálfleik og lítið gerðist en Þórsarar samt ívið sterkari. Staðan 1-0 fyrir Þór í hálfleik.

Eitthvað virðist sem hálfleikste-ið hafi staðið í Þórsurum því Magnamenn voru mun hættulegri fyrsta korter seinni hálfleiks. Kristinn Þór Rósbergsson átti skot rétt yfir á 47. Mínútu. Á 54. mínútu fengu Magnamenn aukaspyrnu á hættulegum stað sem Siggi Marinó setti inn í boxið en unglingalandsliðsmarkvörðurinn í marki Þórs varði feiknavel. Við þetta vakna Þórsarar af teblundinum og sækja nokkuð stíft. Á 63. mínútu fengu Þórsarar hornspyrnu en eftir mikinn atgang í teignum handsamaði Steinþór Már að lokum boltann. Á 67. mínútu sleppur Sveinn Elías í gegn, Steinþór Már ver, Sveinn fær boltann aftur en er óheppinn og setur hann í stöngina og út. Á 69. mínútu átti Guðni Sigþórsson gott skot sem Steinþór gerði vel í að verja.

Eftir þetta var leikurinn barningur og mátti vart á milli liðanna sjá. Leikurinn fjaraði svo út og 1-0 sigur Þórs staðreynd.

Tölfræði:
Þór: 9 skot/ 5 á mark
Magni 6 skot/ 3 á mark

Hér að neðan má sjá viðtal við Lárus Orra Sigurðsson, þjálfara Þórs, eftir leikinn en með því að smella hér má sjá viðtal við Pál Viðar Gíslason, þjálfara Magna.