Magnea Guðlaugsdóttir, þjálfari ÍA, var sársvekkt eftir 2-0 tap liðsins gegn FH í Pepsi deild kvenna í kvöld.
,,Ég er mjög svekkt, því mér finnst við hafa verið betri aðilinn í dag þó þetta hafi endað 2-0. Þær eru fínar, FH liðið, harðar og snöggar og ég vona að þeim gangi bara vel í deildinni," sagði Magnea við Fótbolta.net.
Magnea segir að ÍA hafi skapað sér góð færi í leiknum en að það vanti upp á nýtinguna.
,,Við erum ekki nógu aggresívar fyrir framan markið. Við erum að spila ágætlega úti á velli og fáum einhverjar fimm sex fínar sóknir sem við erum bara ekkert að nýta. Við erum ekki beint ískaldar, en við erum ekki nógu heitar fyrir framan markið," sagði Magnea.
Hún hefur ekki áhyggjur þó að ÍA hafi tapað fyrstu tveimur leikjum sínum í Pepsi-deildinni.
,,Tvö töp, þetta er rétt að byrja þetta mót og við ætlum okkur að ná í stig. Það gerðist ekki í fyrstu tveimur leikjunum en við komum dýrvitlausar á móti Val í næsta leik."
Athugasemdir