Iran 0 - 1 Spain
0-1 Diego Costa ('54)
0-1 Diego Costa ('54)
Íran og Spánn áttust við í síðasta leik dagsins á HM. Liðin leika í B-riðli.
Fyrir leikinn var Íran með þrjú stig eftir sigur á Marokkó en Spánverjar með eitt stig eftir jafntefli við Portúgal.
Í fyrri hálfleik voru Spánverjar með boltann lungan af leiknum en náðu hins vegar ekki að skapa sér mörg færi gegn þéttri vörn Írana.
Ekkert mark var skorað í fyrri hálfleik en sá síðari átti eftir að verða líflegri.
Á 54. mínútu sendi Andres Iniesta boltann innfyrir vörn Írana, á Diego Costa. Ramin Rezaeian komst í boltann, en því miður þá spyrnti hann boltanum í hnéið á Costa og þaðan í markið. Algjört heppnismark.
En knattspyrnuguðirnir spyrja ekki að því. Costa skoraði fótboltamark og er hann kominn með þrjú mörk á mótinu til þessa.
En við markið lifnaði heldur betur við Íran sóknarlega. Aðeins sex mínútum síðar skoraði Saeid Ezatolahi fyrir Íran og allt varð vitlaust.
Íranir fögnuðu gríðarlega og allir varamenn Íran voru komnir inn á völlinn til þess að taka þátt í fagnaðarlátunum. Það sem leikmenn Íran vissu hins vegar ekki var að dómari leiksins var þá búinn að dæma rangstöðu.
Tók það þónokkurn tíma fyrir Írani til þess að átta sig á hlutunum en eftir að dómarinn fékk rangstöðuna staðfesta með VAR þurftu Íranir að bíta í það súra epli að vera enn einu marki undir.
Íranir fengu þó fleiri tækifæri til þess að skora en það tókst ekki. Lokatölur 1-0 sigur Spánar.
Með sigrinum er Spánn komið með fjögur stig líkt og Portúgal en Íran er með þrjú stig.
Í lokaumferðinni mæta Spánverjar Marokkómönnum en þeir eru dottnir úr leik.
Portúgal og Íran mætast þá í hreinum úrslitaleik um sæti í 16-liða úrslitum.
Athugasemdir