Stjarnan og ÍBV mættust í Pepsi-deild kvenna í kvöld en þetta var eini leikurinn í deildinni í kvöld.

ÍBV byrjaði af krafti í leiknum í kvöld og fengu góð færi til þess að skora. Það voru hins vegar Stjörnukonur sem skoruðu fyrsta markið.

Það gerði Lára Kristín Pedersen eftir góðan undirbúning frá Hörpu Þorsteinsdóttur.

Tæpum tíu mínútum síðar jafnaði Shameeka Fishley eftir frábæran undirbúning frá Cloé Lacasse.

Shameeka var svo aftur á ferðinni á 57. mínútu og kom hún Eyjakonum yfir með frábæru skoti.

En lokaorðið áttu Stjörnukonur. Þórdís Hrönn hafði komið inn á sem varamaður og lagði hún upp jöfnunarmarkið fyrir annan varamann, Telmu Hjaltalín Þrastardóttur sem skoraði laglegt mark.

Lokatölur 2-2 og sitja liðin áfram í 4. og 5. sæti deildarinnar.