„Fyrstu viðbrögðin eru í raun þau að við erum mjög vonsviknir að vera dottnir út, við ætluðum okkur svo sannarlega áfram í keppninni," sagði Willum Þór Þórsson, þjálfari KR, eftir tap síns liðs gegn Maccabi Tel-Aviv í kvöld.
Fyrri leikur liðanna fór 3-1 fyrir Maccabi í síðustu viku og því þurftu KR-ingar að skora tvö mörk í kvöld án þess að fá á sig mark, en það varð ekki raunin.
„Við trúðum því alveg til loka að við gætum tekið þá 2-0 hérna heima og fyrri hálfleikurinn gaf tilefni til þess. Við vorum virkilega öflugir í fyrri hálfleik en þú mátt aldrei gleyma þér gegn svona liði."
„Lykilinn hefðu auðvitað verið að nýta öll þessi föstu leikatriði sem við fengum í fyrri hálfleik. Hefðum við gert það og komist í 1-0 þá hefðum við sett smá pressu á þá."
„Því miður fór þetta svona, en hvað varðar frammistöðuna þá er ég virkilega stoltur af liðinu."
Willum var svo spurður út í Viðar Örn en hann reyndist KR-ingum erfiður í leikjunum tveimur.
„Já þeir eru duglegir við það Íslendingarnir að refsa okkur KR-ingunum í þessum leikjum. En Viðar er auðvitað frábær leikmaður, og sérstaklega góður í að klára færin og svo mataði hann samherjana með góðum sendingum í dag og sýndi okkur í dag á hvaða stað hann er kominn."
Garðar Jóhannsson byrjaði óvænt hjá KR-ingum í dag og sagði Willum að það hefði verið uppleggið að vinna í kringum Garðar.
„Já við ætluðum að vinna í kringum Garðar, á móti svona liði þá reynir þú að hægja aðeins ferðina."
Athugasemdir