Eiður Aron spilaði fyrri hluta sumars á láni hjá ÍBV áður en hann fór í Sandnes Ulf í ágúst. Þessi 24 ára gamli leikmaður er á mála hjá Örebro í Svíþjóð en Sandnes Ulf á kost á að kaupa hann eftir tímabilið.

,,Ég hef fengið að spila síðustu þrjá leiki sem miðvörður og kann vel við mig hér í Sandnes," sagði Eiður Aron við Rogalands Avis.

,,Núna þurfum við að halda lífi í vonum okkar um sæti í úrvalsdeildinni en óháð því þá vil ég gjarnan spila áfram með Ulf."

Sandnes Ulf er í botnsætinu í norsku úrvalsdeildinni þegar þrjár umferðir eru eftir en þrjú stig eru upp í sæti í umspili. Landsliðsmarkvörðurinn Hannes Þór Halldórsson leikur einnig með liðinu.