„Liðið skilaði góðri frammistöðu og þetta var eins og leikur á stórmóti," sagði Freyr Alexandersson, þjálfari kvennalandsliðsins, eftir 2-2 jafntefli gegn Kína á æfingamóti þar í landi.
„Þetta var skemmtilegur leikur til að takast á við og spila. Það var langt frá því að vera æfingaleikjatilfinning í kringum leikinn því umgjörðin var fyrsta flokks, fullt af áhorfendum og mikil læti. Maður fékk á tilfinninguna að þetta væri alvöru leikur."
„Ég er mjög ánægður með liðið, á löngum köflum spiluðum við mjög vel. Varnarlega spiluðum við vel eiginlega allan leikinn fyrir utan nokkur atriði sem hefðu mátt fara betur. Jafntefli er sanngjörn niðurstaða, við vorum betri í fyrri hálfleik en þær voru betri í seinni."
Freyr notaði 3-5-2 leikkerfi í fyrsta sinn með landsliðinu, hvernig fannst honum það koma út?
„Bara vel. Fullt af frábærum frammistöðum í leikkerfinu. Það er líka fullt af atriðum sem við getum lagað og við munum skoða betur á videofundum. Þetta er nákvæmlega eins og ég ætlaðist til af mínu liði. Ég er sáttur."
Leikið verður gegn Danmörku á laugardag í þessu æfingamóti í Kína og búast má við miklum breytingum á byrjunarliðinu.
„Við róterum mikið. Veðrið er erfitt og það er rosalegur raki. Ég hef aldrei verið eins sveittur á ævinni og ég get ímyndað mér hvernig leikmenn eru. Við spilum gegn Dönum með gott lið sem gerir allt til að vinna," segir Freyr en viðtalið má sjá í heild í sjónvarpinu hér að ofan.
Athugasemdir