Undirbúningur íslenska landsliðsins fyrir leikina í liðinni undankeppni HM var með öðrum hætti en venja er. Þrívegis fór undirbúningurinn að mestu fram í öðrum löndum en keppt var í, einu sinni í Þýskalandi og tvisvar í Parma en dvalirnar á Ítalíu voru í boði Errea.
Allir eru sammála um að þessi nýbreytni hafi gefið góða raun, enda erfitt að halda öðru fram nú þegar sæti á HM er í höfn! Með því að breyta til varðandi undirbúningsstaði voru æfingar á stöðum þar sem aðstæður geta verið mjög mismunandi takmarkaðar.
Fyrir leik var svo ferðast til keppnisborgarinnar og síðasta æfing tekin á sjálfum keppnisvellinum eins og venja er.
„Ég tel að þetta hafi verið mjög góð nýjung. Flest landslið í Evrópu hóa liðið saman í heimalandinu og taka undirbúninginn þar. Við erum þannig stödd á kortinu að það er ekki hægt að fljúga mönnum til Íslands og veðurfarið er ekki upp á það besta." segir Alfreð Finnbogason, leikmaður Íslands.
„Það er mjög fínt að taka undirbúninginn á öðrum stað og það brýtur upp ferðina ef það er langur undirbúningur. Við fundum góðan stað í Parma og Frankfurt var mjög fínt líka. Ég held að þetta sé það sem koma skal. Með fullri virðingu fyrir sumum þessum löndum sem voru með okkur í riðli vill maður ekki eyða tíma þar lengur en maður þarf."
Leikurinn gegn Tyrklandi, sem vannst 3-0 á glæsilegan hátt, var spilaður í borginni Eskisehir. Undirbúningur Íslands fór samt fram á öðrum stað í landinu, Antalya, sem er sumarleyfisstaður.
„Það var frábært hjá KSÍ að setja þetta þannig upp að við vorum í afslöppuðu umhverfi. Það var góður hiti, góður matur, góðir æfingavellir og vel hugsað um okkur," segir Alfreð sem telur að þetta hafi hjálpað mönnum að gíra sig í þennan stórleik.
„Þetta var einn besti útisigur í sögu íslenska landsliðsins."
Útileikir Íslands í undankeppni HM:
Úkraína - Leikið í Kænugarði
Undirbúningur í Frankfurt, Þýskalandi
Króatía - Leikið í Zagreb
Undirbúningur í Parma, Ítalíu
Kosóvó - Leikið í Shköder í Albaníu
Undirbúningur í Parma, Ítalíu
Finnland - Leikið í Tampere
Undirbúningur í Helsinki, Finnlandi
Tyrkland - Leikið í Eskisehir
Undirbúningur í Antalya, Tyrklandi
Smelltu hér til að hlusta á hljóðvarpsþáttinn Leiðin til Rússlands
Athugasemdir