Eftir stóra sigra gegn Magna og Völsungi var Tindastóll nýjasta fórnarlamb KA í Kjarnafæðismótinu í gær. KA vann 12-0 sigur og er liðið með markatöluna 25-2 eftir þrjá leiki. Elfar Árni Aðalsteinsson hefur skorað tólf mörk á mótinu.

KA menn tóku strax völdin í leiknum í gær en Stólarnir vörðust vel til að byrja með. Á 17. mínútu náði KA góðri sókn upp hægri vænginn sem endaði með flottri fyrirgjöf Steinþórs Freys Þorsteinssonar og óvaldaður Elfar Árni Aðalsteinsson hamraði boltann inn. Stuttu síðar björguðu Stólarnir á línu eftir að Daníel Hafsteinsson fékk færi í teignum.

Á 30. mínútu komst Steinþór einn í gegn eftir frábæra sendingu frá Hallgrími Jónassyni en Atli varði vel í marki Tindastóls. Á 36. mínútu kom svo annað mark KA eftir að Ólafur Aron átti skot utan teigs sem breytti um stefnu af Elfari og Atli var varnarlaus í markinu. Elfar fullkomnaði svo þrennuna eftir frábæra sókn þar sem Hallgrímur Mar vippaði boltanum inná Sæþór sem renndi honum á Elfar fyrir miðju marki og hann lagði boltann í netið. Sæþór fékk svo dauðafæri eftir frábæran sprett hjá Steinþóri en hann hitti ekki boltann. Staðan 3-0 í hálfleik, KA með 13 marktilraunir en Tindastóll enga.

Í seinni hálfleik opnuðust svo allar flóðgáttir og KA bætti við 9 mörkum. Elfar bætti við tveimur í sitt safn, Sæþór skoraði tvö, Steinþór, Hrannar Björn, Bjarni Aðalsteins, Hallgrímur Mar og Áki Sölva skoruðu allir eitt mark hver. Leikurinn var algjör einstefna í seinni hálfleik en Tindastóll átti þó eina skottilraun sem fór þó hátt yfir markið. KA liðið skaut hinsvegar 18 sinnum að marki Tindastóls í síðari hálfleik.

Það verður að segja eins og er að KA liðið lítur mjög vel út. Hrannar Björn og Steinþór frábærir á hægri vængnum, Hjörvar spennandi í vinstri bakverði með Hallgrím Mar síógnandi þar fyrir framan. Miðvarðarparið Guðmann og Hallgrímur Jónasson líta út fyrir að hafa spilað lengi saman og svo er Elfar óstöðvandi í teignum. Það verður spennandi að sjá liðið í Pepsideildinni í sumar.

Maður leiksins: Steinþór Freyr Þorsteinsson (KA)

Sú markatalan 😂😂 #lififyrirka #fotboltinet pic.twitter.com/72gF7hP9r2

— Aðalsteinn Tryggva (@AdalsteinnTr) January 20, 2018