Þegar Grigg kom heim eftir leikinn þá vissi hann alveg að hann myndi ekki ná að sofna strax.

„Síðast þegar ég man eftir því að hafa litið á klukkuna var hún 4 um nótt. Þegar ég kom heim biðu mín fjöldamörg skilaboð frá vinum, liðsfélögum, fyrrum liðsfélögum... það var svo frábært að skoða þau," segir Grigg.

„Ég bjó mér til drykk og fékk mér sæti, svaraði öllum og skoðaði það helsta úr leiknum í sjónvarpinu. Ég hefði ekki getað sofnað eftir leikinn hvort sem er. Ég er venjulega lélegur í að sofna eftir leiki en þessi var sérstaklega þannig."

Grigg horfði á leikinn í endursýningu aftur og aftur til að rifja upp þennan frækna sigur.

„Við vissum að við þyrftum að hafa smá heppni með okkur til að komast áfram og það tókst. En við vorum með leikplan sem við héldum okkur við. Við vissum að fyrstu fimmtán mínúturnar þurftum við að halda okkur í leiknum. Við spiluðum 4-5-1 og þurftum að vera vakandi varðandi hreyfileika þeirra."

Wigan er í þriðja sæti í C-deildinni en liðið hefur tapað tveimur deildarleikjum í röð. Liðið vill nú komast aftur á beinu brautina og leikur gegn Rochdale um komandi helgi.

„Við vitum hversu mikilvægur leikur er á laugardag. Nú mætum við bara aftur til vinnu eftir fagnaðarlætin og markmið okkar er að vinna alla þó mótherja sem við leikum gegn. Það er okkar markmið út tímabilið," segir Grigg.