Albert Guðmundsson er í harðri baráttu um að komast í lokahóp Íslands sem fer á HM í Rússlandi í sumar. Eftir frábæra frammistöðu í janúarverkefninu í Indónesíu er hann í 29 manna hópnum sem er í Bandaríkjunum.
Albert gerir sér grein fyrir því að hann getur svo sannarlega ekki gengið að því vísu að vera í 23 manna hópnum sem valinn verður fyrir Rússland.
Albert gerir sér grein fyrir því að hann getur svo sannarlega ekki gengið að því vísu að vera í 23 manna hópnum sem valinn verður fyrir Rússland.
„Ég er bara í svipaðri stöðu og í Indónesíu, ég verð bara að gera mitt besta og sjá hvað gerist," sagði Albert þegar hann fékk sér sæti með Fótbolta.net á liðshótelinu í Santa Clara.
„Það vantar nokkra sterka leikmenn í hópinn núna en fyrir eru samt sterkir menn hérna. Þetta verður alltaf erfitt fyrir mig og hvern einasta leikmann að komast á HM. Ef ég nota hæfileika mína og næ að sýna Heimi það sem hann vill sjá þá eru möguleikar mínir einhverjir."
Þetta er þriðja A-landsliðsverkefni Albers en hans fyrsta þar sem hann er með aðalhópnum.
„Það má segja að ég sé í fyrsta sinn með stóru hákörlunum," segir Albert.
Þessi tvítugi leikmaður hefur verið ónotaður varamaður hjá aðalliði PSV Eindhoven undanfarna leiki og fengið talsvert færri mínútur en hann hafði vonast eftir.
„Samkvæmt mínu plani vildi ég vera búinn að spila miklu meira. Þetta er frekar strembið og erfitt að fá mínútur, sérstaklega á meðan liðið vinnur alla leiki. Ég er búinn að fá einn byrjunarliðsleik í bikarnum og svo örfáar mínútur í deildinni."
Gæti hann hugsað sér til hreyfings eftir tímabilið?
„Eftir þetta tímabil á ég eitt ár eftir af samningi mínum. Ég skoða allt og ætla ekki að eyða öðru ári á bekknum. Hlutirnir gætu breyst hjá PSV og myndast meiri spiltími fyrir mig. Ef ekki þá mun ég skoða hlutina," segir Albert.
Albert verður með landsliðinu yfir leikinn gegn Mexíkó en fer svo í verkefni með U21-landsliðinu svo hann verður ekki með gegn Perú. Hann bindur vonir við að fá tækifæri í leiknum á föstudagskvöld en viðtalið má sjá í heild í sjónvarpinu hér að ofan.
Athugasemdir