Markvörðurinn efnilegi Rúnar Alex Rúnarsson þurfti að sætta sig við áframhaldandi bekkjarsetu þegar lið hans Nordsjælland heimsótti AaB frá Álaborg í dönsku úrvalsdeildinni í dag. Leikurinn var sá fyrsti í 14. umferð deildarinnar.

Rúnar byrjaði fyrstu leiki tímabilsins í markinu hjá Nordsjælland, en hefur undanfarið þurft að verma tréverkið á meðan Hollendingurinn Indy Groothuizen leysir stöðu hans í markinu.

Nordsjælland gerði sitt þriðja jafntefli í röð í dag þegar liðið heimsótti AaB. Marcus Ingvartsen kom Rúnari Alex og félögum yfir snemma í seinni hálfleiknum, en þegar 77 mínútur voru komnar klukkuna þá var staðan orðin 1-1 og þannig endaði leikurinn.

Nordsjælland er með 14 stig í pokanum eftir 14 leiki, en liðið er í níunda sæti deildarinnar. AaB er með 19 stig í sjöunda sæti eftir þennan leik í dag.

Stöðutöfluna í deildinni má sjá hér að neðan, en það gæti tekið hana smá tíma að uppfæra sig.