„Stuðningsmönnum hefur lengi leiðst einfaldur og óaðlaðandi leikstíll liðsins sem er ekki lengur að skila þeim úrslitum sem gerðu að verkum að liðið endaði í 13., 14. og 10. sæti síðustu þrjú tímabil. Þeir hafa nú fengið það sem þeir vildu," segir Glendenning.

„Eins og frægt er hefur Pulis aldrei fallið á stjóraferli sínum sem stendur saman af níu félögum á 25 árum. Hans stærsta afrek sem stjóri var björgun Crystal Palace fyrir fjórum árum, þegar hann skilaði liðinu í 11. sæti, tólf stigum frá fallsæti. Björgun sem skilaði Pulis titlinum stjóri ársins í úrvalsdeildinni."

„Pulis hefur lengi verið þekktur sem slökkviliðsmaður sem aðhyllist leikstíl sem stuðningsmenn sætta sig við svo lengi sem hann býr til góð úrslit, öruggt sæti í efstu deild og áframhaldandi úrvalsdeildarpening sem flæðir inn."

Þegar Pulis tók við West Brom, 1. janúar 2015, var liðið nákvæmlega á sama stað og núna. Í fjórða neðsta sæti, einu stigi frá fallsæti.

West Brom hefur aðeins unnið fjóra af síðustu 22 úrvalsdeildarleikjum.

Gary Megson er tekinn við stjórn West Brom til bráðabirgða. Hann var knattspyrnustjóri félagsins 2000-2004 og snéri aftur til starfa hjá því í sumar, sem aðstoðarmaður Pulis.