Michael Carrick, miðvallarleikmaður Manchester United, hrósar liðsfélaga sínum Radamel Falcao og trúir því að hann muni reynast liðinu drjúgur í markaskorun.
Ferill Falcao á Old Trafford hefur farið frekar hægt af stað eftir að hann kom á láni frá Monaco síðasta sumar en Kólumbíumaðurinn skoraði eina mark liðsins í jafnteflinu gegn Aston Villa í gær. Carrick hefur trú á að Falcao sé kominn í gang.
,,Hann hefur skorað svo mörg mörk í gegnum árin og þér líður alltaf eins og hann muni skora þegar hann fær færi. Hann skoraði magnað skallamark í gær og ég er ánægður fyrir hans hönd."
,,Hann er að koma til baka eftir að hafa verið frá í smá tíma og vonandi mun hann komast á skrið og hjálpa okkur að komast aftur á sigurbraut." sagði Carrick.
Manchester United fær Newcastle í heimsókn á öðrum degi jóla.
Athugasemdir