Ólafur Hrannar Kristjánsson, fyrirliði Leiknis, skoraði tvö mörk þegar liðið vann 4-2 sigur gegn Gróttu í Lengjubikarnum. Breiðhyltingar hafa fullt hús í riðlinum að loknum tveimur leikjum.
„Það gekk mjög vel í byrjun þegar við vorum að pressa þá. Svo fórum við aftar á völlinn þegar við komumst í 2-0 og þá slitnaði aðeins milli lína hjá okkur og það var ekki nægilega gott. Við gerðum betur í seinni hálfleik og stjórnuðum leiknum," sagði Ólafur.
Grótta jafnaði í 2-2 eftir að Leiknir hafði skorað tvö fyrstu mörkin en Leiknismenn kláruðu leikinn á lokakaflanum.
„Ég hafði aldrei áhyggjur af því að við myndum ekki klára þetta. Þetta voru tvö klaufaleg mörk sem við vorum að gefa þeim og þurfum að slípa varnarleikinn frá fremsta manni til þess aftasta. Við höfum nægan tíma til að laga það. En við skoruðum fjögur og unnum leikinn, við hugsum um það núna og á morgun förum við í að laga það neikvæða."
Leiknismenn eru nýliðar í Pepsi-deildinni í sumar.
„Mér lýst mjög vel á þetta. Við erum að æfa vel og við erum að slípa okkar leik betur og betur. Þetta er allt á réttri leið, þjálfararnir að gera gott mót og leikmenn einbeittir á verkefnið. Menn eru mjög spenntir en einbeittir engu að síður," sagði Ólafur en viðtalið má sjá í sjónvarpinu hér að ofan.
Athugasemdir
