Freyr Alexandersson, landsliðsþjálfari kvenna, hefur tilkynnt hópinn sem mætir Slóveníu og Færeyjum í undankeppni HM í apríl.

Harpa Þorsteinsdóttir, framherji Stjörnunnar, kemur á ný inn í hópinn en hún var ekkert með í undankeppninni síðastliðið haust. Harpa var síðast í landsliðshópnum á EM í Hollandi en hún hefur verið í fríi frá landsliðinu síðan þá.

Elín Metta Jensen og Sigríður Lára Garðarsdóttir koma einnig inn í hópinn á nýjan leik eftir meiðsli en þær voru ekki með á Algarve mótinu á dögunum.

23 lekmenn fóru á Algarve en 20 leikmenn eru í hópnum fyrir komandi verkefni. Andrea Rán Hauksdóttir, Anna Rakel Pétursdóttir, Andrea Mist Pálsdóttir, Berglind Björg Þorvaldsdóttir, Guðný Árnadóttir og Katrín Ásbjörnsdóttir detta út frá því á Algarve.

Sandra Sigurðardóttir, markvörður Vals, er í hópnum en það skýrist á næstu tíu dögum hvort hún verði leikfær fyrir þessa leiki eða ekki. Nýr markvörður verður kallaður inn í hópinn ef Sandra verður ekki með.

Íslenska liðið mætir Slóveníu 6. apríl og Færeyjum fjórum dögum síðar en með sigri í þessum leikjum kemst liðið í góða stöðu fyrir síðustu þrjá leikina sem eru allir á Laugardalsvelli. Slóvenía kemur í heimsókn í júní áður en Þýskaland og Tékkland mæta í september.