Raggi Sig:

„Ég held að þetta sé fyrsta verkefnið mitt í Bandaríkjunum og það er gaman að prófa það," sagði Raggi. „Við erum búnir að heyra að það verði allt pakkað í áhorfendastúkunni og það er alltaf skemmtilegra þegar það er mikið af áhorfendum."

Liðið byrjaði fyrstu dagana í Bandaríkjunum á þéttri dagskrá þar sem leikmenn fóru í auglýsingatökur, ljósmyndatökur til klæðskera og fleira.

„Þetta var svolítið mikið en þetta var vel skipulagt og þó það hafi verið mikið að gera þá tók það ekkert mikinn tíma. Þetta er öðruvísi en það er bara gaman af því."

Ragnar spilar með Rostov í rússnesku deildinni í þriggja miðvarða kerfi.

„Það er svolítið skrítið," sagði Ragnar spurður út í að spila það kerfi. „Ég gerði þetta í fyrsta skipti hjá Rubin og flest lið í Rússlandi gera þetta líka. Þetta er fínt kerfi ef menn vita hvað þeir eru að gera. En ef eitthvað smá fer úrskeiðis þá finnst mér þetta götótt kerfi. Við erum samt búnir að vera að gera þetta ágætlega."

Ásamt Ragnari leika þeir Sverrir Ingi Ingason og Björn Bergmann Sigurðarson með Rostov en er það ekki skemmtilegra en þegar hann var einn í Rubin Kazan?

„Jú það er klárlega öðruvísi og gerir heilmikið fyrir mann að vera með tvo stráka með sér sem tala sama tungumál. Maður fattar það ekki fyrr en maður lendir í því en þetta er búið að vera frábært," sagði Raggi en talar hann íslensku við Sverri í vörninni?

„Sverrir er svolítið að tala spænsku eftir að hann var þar, svo tala ég rússnesku við Rússana svo þetta blandast svolítið en við reynum að halda okkur við íslenskuna."