ÍA og Grindavík mætast í Pepsi-deildinni klukkan 19:15. Skagamenn eru ennþá að leita að sínum fyrstu stigum í sumar á meðan Grindvíkingar eru með fjögur stig eftir þrjár umferðir.

Miðverðirnir Arnór Snær Guðmundsson og Gylfi Veigar Gylfason koma báðir inn í liðið hjá ÍA. Pólski varnarmaðurinn Robert Menzel er einnig í liðinu og því er útlit fyrir að Skagamenn skipti um leikkerfi og verði með þrjá miðverði.

Bakvörðurinn Hilmar Halldórsson kemur einnig inn í liðið en Hallur Flosason, sem hefur verið hægri bakvörður, er fjarri góðu gamni. Sóknarmaðurinn ungi Tryggvi Hrafn Haraldsson hefur verið að glíma við meiðsli og hann byrjar á bekknum.

Hjá Grindavík er varnarmaðurinn Björn Berg Bryde ekki með í dag. Will Daniels kemur inn í liðið en annars er sama liðsskipan og í tapinu gegn Víkingi Ólafsvík í síðustu umferð. Will skoraði fjögur mörk gegn Völsungi í Borgunarbikarnum í síðustu viku.