Heimild: mbl.is
FH mætir Inter Bakú í Aserbaídsjan á morgun í seinni viðureign liðanna í 2. umferð forkeppni Evrópudeildarinnar. Inter vann fyrri leikinn 2-1 og er FH því í afar erfiðri stöðu fyrir seinni leikinn.
Ekki bætir úr skák að FH verður án mikilvægra leikmanna í leiknum á morgun sem verður klukkan 16 að íslenskum tíma. Frá þessu greinir heimasíða Morgunblaðsins.
Varnarmaðurinn Guðmann Þórisson hefur verið að spila í gegnum meiðsli í hásin síðustu leiki og getur ekki spilað gegn Inter.
Sóknarmaðurinn Steven Lennon er meiddur í hæl og ferðaðist ekki með til Aserbaidsjan. Þá veiktist Atli Viðar Björnsson í ferðalaginu til London en þar millilenti FH.
„Í fluginu á leið til London fór með að líða illa og við komuna á flugvöllinn var ég algjörlega búinn. Ég var einn í herbergi um nóttina og í gærmorgun var ljóst að ég hafði enga heilsu til að fara með liðinu til Bakú," sagði Atli við mbl.is.
Þá verður Kristján Finnbogason, hinn 44 ára varamarkvörður FH, í markinu þar sem Róbert Örn Óskarsson fékk rauða spjaldið í fyrri leiknum. Kristján verður elsti leikmaður í sögu Evrópudeildarinnar til að byrja leik í keppninni.
Athugasemdir