„Ég er mjög ánægður með að hafa skrifað undir þriggja ára samning við þetta félag, mér líkar vel við mig hér og langar að vinna titla með félaginu," sagði Avni Pepa fyrirliði ÍBV en hann skrifaði undir nýjan samning við félagið í dag sem heldur honum hjá Eyjaliðinu næstu þrjú árin.
„Þetta er lítil eyja en ég er hérna til að spila fótbolta. Liðið byrjaði tímabilið vel en við höfum ekki verið að ná í jafnmörg stig í undanförnum leikjum og verðum að reyna að komast á beinu brautina aftur,"
Markmiðið er skýrt, við tökum einn leik í einu og reynum að vinna sem flesta, við viljum enda í topp 6 í deildinni og fara alla leið í bikarnum," sagði Avni aðspurður út í gengi liðsins og markmið þeirra á þessu tímabili.
Avni er ekki aðeins lykilmaður hjá félagsliði sínu heldur er hann einnig fastamaður í landsliði Kosovo sem var nýlega dregið í riðil með Íslandi fyrir undankeppni HM 2018.
„Þetta er erfiður riðill en þetta verður góð reynsla fyrir mig og liðið. Ísland hefur staðið sig mjög vel en þú veist aldrei hvað gerist í fótbolta." sagði Avni Pepa að lokum.
Athugasemdir