„Þetta var að detta í fjögur ár núna í ágúst og ég er nuna fyrst að detta almennilega í gang," segir Eyjólfur sem var í viðtali í útvarpsþættinum Fótbolti.net á X-inu á laugardag. Viðtalið má heyra í heild sinni í spilaranum hér að ofan.

Eyjólfur meiddist í leik með SönderjyskE í Danmörku árið 2012.

„Afleiðingin af því var náravesen sem gekk mjög illa að finna út úr. Það þurfti þrjár aðgerðir til að laga það. Ég var orðinn klár fyrir ári síðan en það hefur tekið mjög langan tíma að koma sér í gang. Margir vöðvar og festingar höfðu legið í dvala. Það hefur í raun tekið heilt ár að byggja þetta upp. Núna hef ég átt frábæran mánuð og getað æft og spilað af fullum krafti."

„Ég hef spilað fótbolta síðan ég var fimm ára og þetta er það sem maður elskar að gera. Það þarf mjög mikið til að maður gefist upp. Það komu dagar þar sem maður spurði sig af hverju maður væri að þessu. Það voru mikil vonbrigði eftir fyrri tvær aðgerðirnar sem skiluðu engu en félögin úti voru hálpleg og ég fékk að kíkja heim þegar þetta var sem erfiðast. Það var aldrei inni í myndinni að gefast upp."

„Ég var 27 ára þegar þetta gerðist og ég er 31 árs í dag. Ég missti af árunum þar sem maður á að vera á toppnum og auðvitað er maður pínu svekktur yfir því. Núna í dag er ég samt ekkert að spá í það, ég er bara svo ótrúlega glaður og ánægður með að vera að spila fótbolta í dag," segir Eyjólfur.

Þegar hann meiddist hafði hann samið við Midtjylland í Danmörku. Hann var í herbúðum félagsins þegar það hampaði danska meistaratitlinum en hefur sagt í viðtölum að hann hafi ekki litið á sig sem Danmerkurmeistara.

„Ég kom meiddur til Midtjylland og var meiddur hjá þeim í tvö og hálft ár, ég spilaði einhverja tíu leiki en það var bara gálgafrestur. Ég var meiddur. Ég viðurkenni að ég mætti með samviskubit upp á nánast hvern einasta dag á æfingu yfir því að vera að þiggja laun fyrir það sem ég var ekki að gera. Það var verið að senda mig í dýrar aðgerðir út um allt og ég á þeim ótrúlega mikið að þakka. Þeir þurftu í raun ekki að gera þetta," segir Eyjólfur sem var áhorfandi að velgengni liðs síns.

„Það hefði verið yndislegt að taka þátt í því að spila í Evrópukeppni og verða danskur meistari. Auðvitað var erfitt að sjá liðsfélaga sína upplifa stærstu stund sína á ferlinum meðan ég var langt frá því að geta spilað. Ég notaði þetta samt sem hvatningu að ég vil upplifa það sem þeir upplifðu. Þeir unnu hart að einhverju og uppskáru með meistaratitli. Það var þvílíkt spark í rassinn fyrir mig að halda áfram."

Eyjólfur kom heim síðasta vetur og gekk í raðir Stjörnunnar en í viðtalinu hér að ofan ræðir hann um tímabilið í Garðabænum og svarar fjölbreyttum spurningalista í Tíunni meðal annars.

Stjarnan er í baráttu um Íslandsmeistaratitilinn en liðið mætir FH í kvöld klukkan 18.

Leikir kvöldsins í Pepsi-deildinni
18:00 FH-Stjarnan (Kaplakrikavöllur)
18:00 Víkingur R.-ÍBV (Víkingsvöllur)
18:00 Fylkir-ÍA (Floridana völlurinn)
20:00 Þróttur R.-Valur (Þróttarvöllur)