,,Þetta var brösulegt lengi framan af og þær fengu eitt, tvö góð færi þrátt fyrir að við værum meira með boltann en þær voru skipulagðar og skynsamar. Þetta var erfitt framan af en endaði vel svo við erum mjög sátt," sagði Ólafur Þór Guðbjörnsson þjálfari Stjörnunnar eftir að liðið tryggði sér Íslandsmeistaratitilinn með 3-0 sigri á Aftureldingu í kvöld.
Lestu um leikinn: Stjarnan 3 - 0 Afturelding
,,Það er mjög gaman að vinna með þennan hóp og það er ástæðan fyrir því að ég fór út í þetta aftur, ég vissi hvaða hópur var á bakvið okkur. Bæði í kringum Stjörnuna og leikmannahópurinn. Þetta er búið að vera frábært tímabil."
Stjarnan á aðeins eftir lokaleikinn gegn ÍA á Akranesi en svo hefst Meistaradeildin í október.
,,Við ákváðum það og allur hópurinn er búinn að vera einbeittur í því að Meistaradeildin hefur ekki verði á dagskrá fyrr en búið er að klára þetta mót. Nú förum við að skoða andstæðingana og velta okkur upp úr því og sjá hvað við gerum."
Stjarnan skoraði ekki fyrsta klukkutímann en Harpa Þorsteinsdóttir fór svo í gang og skoraði þrennu frá 67. mínútu. En hvar geymir hún ON/OFF takkann?
,,Ég veit það ekki, og væri alveg til í að vita hvar hann væri. Hún er búin að spila frábærlega eins og liðið í sumar. Það er alltaf verið að tala um Hörpu, hún er að klára færin en það eru margir að skapa fyrir hana mikið, nema þriðja markið í dag, hún setti það alveg sjálf. Að Öðru leyti frábær hópur."
Athugasemdir