Costa fór frá Atletico til Chelsea árið 2014, en hann hefur ekki mætt til æfinga hjá Chelsea síðan hann fékk þær upplýsingar að hann væri ekki í áætlunum Antonio Conte fyrir þetta tímabil.

„Ég vildi snúa aftur til Atletico. Ég ætla ekki að sýna vanþakklæti gagnvart Chelsea, þar sem ég var líka mjög ánægður þar, að spila í liði sem var frábært," sagði Costa þegar fjölmiðlar náðu af honum tali á flugvellinum núna fyrir stuttri stund.

„Atletico er heimili mitt og hingað er ég kominn."

Costa var síðan spurður út í formið sitt, hvort hann hefði einhverjar áhyggjur af því þar sem hann hefur ekki verið að æfa með Chelsea að undanförnu. Costa er ekki áhyggjufullur.

„Ég er ekki í eins slæmu formi og allir halda hér erum við með Oscar Ortega (styrktarþjálfara Atletico) sem mun koma mér í form."

Þessi 28 ára sóknarmaður mun ekki geta spilað fyrir Atletico fyrr en í janúar vegna kaupbannsins sem FIFA setti spænska félagið í. Hann er þrátt fyrir það gríðarlega spenntur.

„Ég er mjög ánægður. Þetta hefur tekið langan tíma, en þetta er saga sem endar vel," sagði Costa.

Sjá einnig:
Diego Costa: Ég er ekki fúll út í neinn