Mauricio Pochettino, stjóri Tottenham, bauð á dögunum öllum leikmönnum liðsins og þjálfaraliðinu út að borða. Pochettino borgaði 5000 pund (726 þúsund krónur) fyrir reikninginn eftir máltíðina.
„Ég bauð þeim svo auðvitað borgaði ég reikninginn í lokin. Þegar ég borga þá borga ég vel. Góður veitingastaður, góður matur og gott vín," sagði Pochettino.
„Við fengum steik frá Spáni og Ástralíu en argentínskt vín, það er best."
„Að fara út að borða skapar tengsl og tilfinningar á milli leikmanna. Þegar þú ert að berjast í keppni þá þarf að vera vilji til að hjálpa liðsfélögum þínum ennþá meira og vilja gera ennþá meira fyrir liðsfélagana."
„Við reynum alltaf að finna tíma til að eyða saman fyrir utan æfingasvæðið því það er allt öðruvísi. Það er erfitt hér á Englandi. að finna dag eða kvöld þar sem við getum verið saman."
„Við erum með svo stífa dagskrá. Við spilum á 2-3 daga fresti og svo eru leikmenn farnir í landsliðsverkefni," sagði Pochettino.
Tottenham er með átta stig eftir fimm umferðir í ensku úrvalsdeildinni en liðið mætir West Ham í Lundúnarslag í hádeginu á morgun.
Athugasemdir