Það hefur verið mikil blóðtaka í liði Fram eftir að tímabilinu lauk en liðið hefur samtals misst fjórtán leikmenn frá því í sumar.

Bjarni Guðjónsson hætti með liðið eftir að það féll niður í fyrstu deild og flestir af þeim leikmönnum sem hann fékk til félagsins hafa nú þegar yfirgefið Fram.

Sveinbjörn Már, sem er 26 ára gamall, æfir með félaginu núna en hann spilaði með KFG í 4. deildinni í sumar. Hann er þó uppalinn á Húsavík og á yfir 60 leiki að baki með Völsungi í deild og bikar.

Guðmundur Óli, sem er 28 ára gamall, spilaði einnig með KFG í sumar auk þess sem hann lék með KV. Lengst af hefur hann leikið með Völsungi og KA.

Markvörðurinn öflugi, Sigurður Hrannar Björnsson, er þá kominn aftur í Safamýrina eftir að hafa verið á mála hjá Víking. Hann spilaði tvo leiki með Víkingum síðasta sumar og þá lék hann með Tindastól sumarið 2013. Hann er þó uppalinn hjá Fram og lék upp alla yngri flokka þar.

Sigurður og Kristinn Rúnar Jónsson, þjálfari Fram, hafa þá áður unnið saman er Sigurður var í U19 ára landsliði Íslands.

Þá æfir Rúrik Andri Þorfinnsson með félaginu en hann lék einn leik með Augnablik í sumar. Hann var einnig á mála hjá Fylki í Pepsi-deildinni og lék þar 21 leik á tveimur tímabilum en þrálát meiðsli settu strik í reikninginn. Hann er uppalinn í Fram eins og Sigurður og á einn leik að baki í deild með félaginu.

Aron Þórður Albertsson sem rifti samning sínum við Fram á dögunum æfir þá með HK í fyrstu deildinni og sömu sögu má segja um Halldór Arnarsson, sem hefur verið á mála hjá Fram síðustu tvö ár en hann er samningslaus.