Freyr Alexandersson, landsliðsþjálfari kvenna, tilkynnti í dag hóp fyrir Algarve-mótið sem fer fram á Portúgal 4.-11. mars. Ísland er í riðli með Bandaríkjunum, Noregi og Sviss og mætir fyrst Svisslendingum þann 4. mars.
Smelltu hér til að sjá hópinn
Smelltu hér til að sjá hópinn
„Þetta er mikilvægasti undirbúningur okkar á þessu ári fyrir undankeppni EM sem hefst í september. Þetta eru tíu dagar sem við fáum, fjórir leikir, átta æfingar og toppaðstæður. Ég gæti ekki verið ánægðari með fyrirkomulagið á því," segir Freyr.
„Við mætum liðum sem eru að undirbúa sig fyrir HM og eru mjög vel undirbúin. Mótið er gríðarlega sterkt núna. Þetta verður erfitt en við fáum að sjá hvar við stöndum."
Freyr ætlar að prófa fleiri en eitt leikkerfi á mótinu.
„Við ætlum að prófa útgáfu af 4-4-2 og svo kerfinu sem við spiluðum í síðustu undankeppni. Við munum leggja áherslu á lágpressu á móti hápressunni sem við settum mikla orku í síðustu undankeppni. Við þurfum meira jafnvægi þarna á milli. Við erum að vinna í því að verða betra lið."
Á fréttamannafundi sem haldinn var í dag lýsti Freyr yfir gríðarlegri ánægju með metnað leikmanna til að vera í sem besta standi fyrir verkefnin framundan.
„Ég var mjög ánægður með niðurstöðurnar sem ég fékk úr líkamlegum mælingum sem komu um helgina. Við erum búin að veita þeim gríðarlegt aðhald í þessum þætti síðan ég tók við og hef fengið góðan stuðning frá Knattspyrnusambandinu í því verkefni. Niðurstöðurnar eru frábærar og kannski framar vonum. Í síðustu mælingu voru vonbrigði og við þurftum að ræða saman. Leikmennirnir brugðust við og það er það sem maður vill," segir Freyr.
Margrét Lára Viðarsdóttir fer með til Algarve en hún er ekki hugsuð sem burðarás á mótinu.
„Margrét er að koma til baka eftir barnsburðarleyfi og er að ná fyrra formi. Það sem er mjög jákvætt við hana er að hún er meiðslalaus. Hún kemur inn til að ná tökum á leikfræðinni okkar. Hún tekur mínútur en er ekki að koma í það hlutverk sem hún var í ár eftir ár sem burðarás. Við þurfum að gefa henni meiri tíma til að aðlagast. Í september verður hún vonandi klár," segir Freyr en viðtalið má sjá í heild sinni í spilaranum hér að ofan.
Athugasemdir