Kristbjörg er hér vinstra megin á myndinni ásamt Rögnu Lóu Stefánsdóttur.
„Við erum mjög stoltar af stelpunum. Við fórum inn í þennan leik til að skoða leikkerfi og skipulag hjá okkur. Við erum mjög stoltar af stelpunum, við hefðum viljað vinna en erum samt sem áður mjög ánægðar," sagði Kristbjörg Helga Ingadóttir aðstoðarþjálfari Fylkis eftir 1-3 tap gegn Val í úrslitleik Reykjavíkurmóts kvenna í kvöld.
Lestu um leikinn: Fylkir 1 - 3 Valur
Fylkir náði forystunni eftir 33 sekúndna leik og Kristbjörg segir að það hafi verið rætt í klefanum fyrir leik hvað ætti að gera ef það tækist.
„Við sögðum inni í klefa að ef við myndum skora eftir 30 sekúndur þá ætti að halda skipulaginu í fyrri hálfleik. Þetta var rætt," sagði Krissa.
„Þetta var fín byrjun hjá okkur og fyrri hálfleikurinn mjög góður. Við misstum aðeins dampinn í seinni hálfleik en samt sem áður í heildina fínn leikur."
Verulegar breytingar eru á Fylkis liðinu frá síðustu leiktíð og margir ungir leikmenn hafa gengið í raðir félagsins.
„Við erum með algjörlega nýtt lið í höndunum og erum að nýta þennan tíma í að púsla okkur saman og skoða leikmenn og finna taktinn. Við erum á réttu róli."
Athugasemdir
