„Mér líkar mjög vel hingað til. Þetta er flottur klúbbur þar sem er allt til alls," sagði Emil Hallfreðsson við Fótbolta.net aðspurður út í nýtt félag sitt Udinese. Emil fór til Udinese í janúar eftir að hafa leikið með Verona frá því árið 2011.
„Ég var búinn að vera lengi í Verona og þjálfarinn sem ég hafði verið með þar í fimm ár var farinn. Það átti smá þátt í ákvörðuninni líka. Mér fannst þetta vera rétti tíminn til að prófa eitthvað nýtt," sagði Emil.
„Ég er í svipuðu hlutverki og hjá Verona, ég á að styrkja miðjuna. Þeir fengu mig sem reynslumann inn í hópinn, þó að ég sé ekki hundgamall."
Emil hefur ekki ennþá náð að vinna leik í Serie A vetur. Verona hefur verið í basli og Emil bíður ennþá eftir fyrsta sigurleiknum með Udinese.
„Sigurleikirnir eru búnir að vera mjög fáir en það hefur verið mjög mikið af jafnteflum. Það þýðir ekki að pæla í þessu. Það er bara að halda áfram."
Emil hefur verið inn og út úr byrjunarliði Íslands undanfarin ár en hann er ákveðinn í að sanna sig fyrir EM.
„Ég gef allt mitt í þetta. Vonandi næ ég að setja Heimi og Lars í smá vandræði með að velja liðið. Svo er þetta undir mér komið þegar ég fæ sénsinn til að standa mig," sagði Emil.
Hér að ofan má sjá viðtalið í heild sinni.
Athugasemdir