„Hún er nógu góð til að ég geti æft og spilað. Síðustu prósentin koma smá saman. Það er þolinmæðisverk að komast aftur í 100% stand en ég er kominn mjög langt og nógu langt til að spila. Það á allt að halda," sagði Hannes við Fótbolta.net í dag.

Hannes fór til norska liðsins Bodö/Glimt á láni á dögunum og hann hefur spilað í fyrstu tveimur umferðunum í norsku úrvalsdeildinni.

„Þetta hefur gengið mjög vel. Ég er virkilega ánægður með að hafa hent mér í djúpu laugina og byrjað að spila. Við vorum á báðum áttum þegar ég ræddi við Bodö hvort ég ætti að taka þessa fyrstu tvo leiki eða ekki. Þeir settu það í hendurnar á mér og við ákváðum að láta vaða. Það gekk eins og í sögu. Það hafa ekki verið nein vandamál. Leikirnir gengu vel og öxlin er verkjalaus. Ég er mjög sáttur við standið."

Hannes meiddist á æfingu fyrir landsleikinn gegn Tykjum í október. Hugsaði hann einhverntímann að EM draumurinn væri úr sögunni?

„Ég leyfði mér ekki að hugsa út í það. Það er staðreynd að þessi meiðsli eru þess eðlis að ég vissi í raun ekki hvað beið mín. Hvort að þetta myndi ná að jafna sig eða hvort það myndi taka lengri tíma. Þetta hefði getað fallið hvoru megin sem er."

„Þetta var óvissutími eftir aðgerðina. Ég gat bara vonast eftir að þetta myndi ganga vel og ég gerði allt sem í mínu valdi stendur til að koma þessu á réttan stað. Þetta hefur sem betur fer þróast á eins góðan hátt og vonast var eftir. Mér tókst að koma þessu í stand fyrir þessa tvo leiki (gegn Grikklandi og Danmörku) og að hafa náð tveimur leikjum í norsku úrvalsdeildinni á undan því er framar vonum," sagði Hannes.

Hér að ofan má sjá viðtalið við Hannes í heild.