„Við gerum örugglega einhverjar breytingar frá því á liðinu sem spilaði í undankeppninni," sagði Heimir og bætir við að breytingar verði á millli leikjanna á morgun og þriðjudag.

„Við reynum að sjá sem flesta leikmenn í þessu verkefni. Ég býst ekki við að einhver leikmaður spili tvisvar sinnum 90 mínútur. Maður veiet aldrei en það er ólíklegra en hitt."

Danir verða líklega með þriggja manna vörn gegn Íslendingum annað kvöld en þeir eru að spila sinn fyrsta leik undir stjórn Age Hareide.

„Við spilum svæðisvörn og það skiptir engu hvaða leikaðferð andstæðingurinn hefur, við eigum að geta útfært okkar varnarleik á sama hátt. Það væri gaman að keppa við þriggja miðvarða kerfi í tveimur leikjum því Grikkir hafa líka verið að prófa það," sagði Heimir sem er bjartsýnn á sigur á morgun.

„Það væri voða gaman og gott fyrir sjálfstraustið að vinna Danina. Eigum við ekki að segja að núna sé komið að því," sagði Heimir brosandi.

Leikirnir gegn Dönum og Grikkjum eru þeir síðustu áður en hópurinn verður tilkynntur fyrir EM í Frakklandi. Heimir segir að ferðin núna sé mikilvæg í undirbúningi fyrir EM.

„Við erum að nýta þessa ferð líka til að hugsa um Frakkland og kynna reglur. Það er ýmislegt sem snýr að öryggi, fjölmiðlum, læknistestum og fleiru. Það er ágætt að geta unnið það fyrirfram, þannig að það sé ekki allt nýtt þegar við komum til Frakklands," sagði Heimir sem reiknar með að væntingar hjá íslensku þjóðinni verði miklar í sumar.

„Auðvitað höfum við áhyggjur af því. Það er íslenskt og eitthvað sem búast má við, að menn fari fram úr sér. Við höfum bent á að íslenskur fótbolti stendur og fellur ekki með einum mánuði í Frakklandi 2016. Það skiptir öllu máli að halda áfram stöðugleika. Fyrst og fremst verðum við að njóta þess að vera í lokakeppni, ekki springa úr spenningi og fá það allt í andlitið. Við þurfum að njóta þess að vera þarna og taka þátt í því í stað þess að byggja upp of mikla spennu," sagði Heimir.

Við vitum ekki hvaða leikmenn hann ætlar að nota .