„Ég held að þetta sé efst í kollinum á manni en maður er að einbeita sér að sínu félagsliði og því sem er að gera þar. Sumarið er samt mjög stórt og ofarlega í huga."

Emil leikur með Udinese á Ítalíu en hefur ekki komið við sögu í síðustu fjórum leikjum liðsins og aðeins einu sinni byrjað á árinu.

„Það er mjög fínt að komast aðeins í annað andrúmsloft og ég tala nú ekki um að koma hingað þar sem allt er jákvætt og skemmtilegt. Þetta tímabil er búið að vera erfitt. Ég hef spilað lítið eftir að það kom nýr þjálfari en fótboltinn er bara svoleiðis. Sumir þjálfarar fíla ákveðna leikmenn og aðra ekki," sagði Emil.

„Ég er búinn að vera í þessu það lengi að það kemur mér ekkert á óvart. Það eina sem ég geri er að halda áfram að berjast og reyna að vinna mér sæti í liðinu. Hann verður bara að fara að skilja að hann verður að fara að spila mér. Það skiptir öllu máli að halda sér í góðu standi og góðu formi og vera tilbúinn þegar kallið kemur. Hlutirnir eru svo ótrúlega fljótir að gerast í fótbolta að það skiptir máli að vera með hausinn á réttum stað.".

Á meðan Ísland er á leið á Heimsmeistaramótið í Rússlandi eru Ítalir að fara að sitja heima eftir að hafa mistekist að tryggja sér sæti á mótinu.

„Þeir eru alltaf vælandi yfir því að HM verði ekki jafn skemmtilegt því þeir eru ekki. Ég bendi þeim á að litla Ísland verði með í staðinn og við skulum bæta þetta upp. Þeir eru skiljanlega sárir að vera ekki með á mótinu enda 60 ár síðan þeir voru ekki með. Það er gaman að nudda þessu aðeins í þá."

Ítalir eiga þó einn fulltrúa á mótinu því Errea búningarnir sem Ísland leikur í eru ítalskir. Við spurðum Emil að lokum út í þá.

„Það er mjög gaman, ég er búinn að panta 30 búninga sem ég ætla að gefa nokkrum í félaginu. Ég ákvað fyrir löngu að þeir fengju bláa treyju frá ítölskum framleiðanda. Það er smá sárabót fyrir Ítalina."