Romelu Lukaku hefur mikið verið orðaður frá Everton í sumar en hann er meðal annars sagður þrá það að spila Meistaradeildarfótbolta en þá ætti hann ekki að ganga til liðs við Man Utd ef marka má orð stjóra hans.

„Ég sé Man Utd ekki enda í topp fjórum. Meiðsli Zlatan líta illa út og þegar ég horfi á leikina sem þeir eiga eftir þá sé ég þá missa af þessu, þeir hafa ekki heillað með spilamennsku sinni," sagði Koeman.

„Við hjá Everton gerðum tvívegis jafntefli við Man Utd og í bæði skipti hefðum við getað gert betur. Það að Man Utd á í erfiðleikum með lið eins og Anderlecht sýnir hvernig tímabil þeir eru að eiga."

Þó að Lukaku, sem hefur skorað 24 mörk í ensku úrvalsdeildinni í vetur, virðist ákveðinn í að yfirgefa félagið í sumar er Koeman á öðru máli.

„Everton getur haldið í hvaða leikmann sem er, líka Lukaku sem á tvö ár eftir af samning sínum. Það er margt mögulegt hérna og við viljum ná í bestu leikmennina og komast í Meistaradeildina."