„Ætli við séum ekki með átta ferska leikmenn á æfingu. Það er gott að geta byrjað á einhverju," sagði Heimir Hallgrímsson, landsliðsþjálfari, í samtali við Fótbolta.net í dag.

„Æfingin í dag fer mest í að sjá hvernig standi menn eru í. Það eru einhverjir með smá hnjask í lok tímabils og við erum að meta standið á mönnum. Við munum kýla aðeins á þetta í dag og sjá hverjir fara að væla."

Ísland fær styttri tíma með allan hópinn en margir keppinautar á EM.

„Ég var að koma frá Ungverjalandi þar sem ég sá Ungverja spila við Fílabeinsströndina. Þeir eru búnir að vera saman í viku og verða allir saman í þessari viku. Þegar við hittum hópinn okkar eru þeir búnir að slípa sig saman í hálfan mánuð. Við erum með marga í Skandinavíu og við getum ekki gert þetta öðruvísi. Það er kannski ekkert betra fyrir okkur Íslendinga að fá of langan tíma. Við erum vertíðarfólk, brettum upp ermar og gerum þetta hratt og vel."

Framundan er vináttulandsleikur við Norðmenn á miðvikudag í næstu viku. Ljóst er að Ísland verður ekki með sitt sterkasta lið í þeim leik.

„Við spilum á þeim mönnum sem geta spilað þann leik. Flestir leikmennirnir á Skandinavíu eru að spila 30. maí og það er ekki sniðugt að spila mörgum þeirra 1. júní. Þeir eiga vanalega frí tveimur dögum eftir leik. Við leggjum áherslu á að láta leikmenn sem þurfa að spila taka þann leik. Jói Berg og Aron spiluðu síðast fyrir þremur vikum svo þeir þurfa á tveimur leikjum að halda," sagði Heimir en Ísland mætir einnig Liechtenstein á Laugardalsvelli þann 6. júní.

Hér að ofan má sjá viðtalið í heild sinni.