„Það er alltaf voða gott að koma heim," sagði Ragnar Sigurðsson við Fótbolta.net í dag en hann er mættur til undirbúnings fyrir EM með íslenska landsliðinu.
Ragnar og félagar í Krasnodar enduðu í fjórða sæti í rússnesku úrvalsdeildinni á nýliðnu tímabili. „Við hefðum kannski tekið því fyrirfram. Miðað við hvernig við spiluðum seinni hluta tímabils þá voru þetta vonbrigði," sagði Ragnar en verður hann áfram í Rússlandi?
„Ég er með tveggja ára samning svo það er líklegt, nema ég fái tilboð frá öðru liði. Ég held að mín framtíð komi í ljós eftir EM. Aðalmálið er að einbeita sér að EM og sjá síðan hvað gerist."
Ragnar skrifaði á Twitter í morgun: „Varla buinn að keyra i 5 min herna a islandi þegar það var staðfest fyrir mer enn og aftur.. Islendingar.. Lelegustu ökumenn i heimi."
Fótbolti.net fékk Ragnar til að tjá sig meira um umferðarmenninguna á Íslandi.
„Það er oft talað um Rússa sem skelfilega ökumenn en það er allt annað að keyra þar en hér. Ég skil ekki hvernig er hægt að keyra eins og hérna. Fólk er á vinstri akrein á 30 og hleypir manni ekki fram úr. Fólk er að svína á hvort annað og þetta er bara skelfilegt," sagði Ragnar brosandi.
Hér að ofan má sjá viðtalið í heild sinni.
Varla buinn að keyra i 5 min herna a islandi þegar það var staðfest fyrir mer enn og aftur.. Islendingar.. Lelegustu ökumenn i heimi
— Ragnar Sigurðsson (@sykurinn) May 23, 2016
Athugasemdir