Þjálfari umferðarinnar er Ágúst Gylfason hjá Fjölni sem mætti með sína sveit í Kaplakrikann og vann óvæntan 2-1 útisigur. Ivica Dzolan var valinn maður leiksins og þá er Birnir Snær Ingason einnig í úrvalsliðinu en þessi hæfileikaríki leikmaður var mjög sprækur.

Eyjamenn eru í öflugri stigasöfnun og þeir heimsóttu erfiðan útivöll í Ólafsvík, skoruðu þrjú og fengu þrjú stig. Halldór Páll Geirsson hefur komið öflugur inn í markið hjá ÍBV og er í úrvalsliðinu.

Felix Örn Friðriksson var frábær sem vængbakvörður hjá ÍBV og Hafsteinn Briem sem klettur í hjarta varnarinnar.

Breiðablik landaði sínum fyrstu stigum þegar liðið vann Víking R. í þjálfaralausa leiknum. Davíð Kristján Ólafsson og Gísli Eyjólfsson hjá Blikum eru í liði vikunnar.

Valsmenn halda áfram á flugi. Einar Karl Ingvarsson og Sigurður Egill Lárusson hjá Val fengu bónusstigin í sigrinum gegn KR í stórslagnum.

Síðastur en andstæðan við sístur er Andri Rúnar Bjarnason, leikmaður umferðarinnar. Andri henti í þrennu þegar Grindavík vann ÍA á Skaganum.

Sjá einnig:
Lið 3. umferðar
Lið 2. umferðar
Lið 1. umferðar