„Mér fannst þetta bara allt í lagi leikur. Mér fannst hann ekkert sérstaklega vel spilaður hjá hvorugu liði. En þetta voru þrjú stig, við héldum hreinu og skoruðum tvö ágætis mörk. Við getum verið ánægð með það,“ sagði Elín Metta Jensen, framherji Vals, eftir 2-0 sigur á nýliðum HK/Víkings.
Lestu um leikinn: Valur 2 - 0 HK/Víkingur
„Mér fannst tempóið svolítið hægt. Ég veit ekki alveg hvað veldur. Maður setur alltaf kröfur á sig og liðið sitt og vill alltaf gera betur. Við hefðum mögulega getað gert eitthvað betur en ég er auðvitað ánægð með þrjú stig,“ svaraði Elín Metta aðspurð um hvað hefði betur mátt fara og hrósaði svo andstæðingunum í HK/Víking sem spiluðu öflugan varnarleik í kvöld.
Valskonur komust upp í 2. sæti með sigrinum, eru með 9 stig af 12 mögulegum, og Elín Metta er nokkuð ánægð með byrjunina og bjartsýn á framhaldið þrátt fyrir tapið gegn Stjörnunni.
„Við erum að safna stigum. Það kom smá bakslag á móti Stjörnunni en við höldum bara ótrauðar áfram og vitum að það er hellingur af stigum í boði,“ sagði Elín Metta meðal annars en hægt er að horfa á allt viðtalið við hana í sjónvarpinu hér að ofan.
Athugasemdir