„Við fengum dauðafæri til að komast yfir í þessum leik en eftir það náðum við aldrei að klukka þá almennilega," sagði Helgi Sigurðsson, þjálfari Fylkis, eftir tapið gegn Stjönunni í kvöld.
Lestu um leikinn: Stjarnan 3 - 0 Fylkir
„Við lentum undir í baráttunni. Þeir voru bara sterkari á flest öllum sviðum. Auðvitað voru allir að leggja sig fram en stundum gengur það ekki. Það þarf bara að skoða af hverju þeir ganga ekki."
„Þetta er fúlt því við vorum á góðu skriði. Menn geta tapað fótboltaleikjum en þetta er bara spurning um hvernig koma til baka. Þetta var okkar langslakasti leikur það sem af er tímabili. Úrslitin voru ljót en þetta voru bara þrjú töpuð stig."
Fylkir heimsækir FH í Kaplakrika á mánudag.
„FH er með frábært lið. Þessi deild er þannig að það er mikið af óvæntum úrslitum. Deildin er jöfn og við verðum að halda áfram og laga það sem betur má fara. Við í þjálfarateyminu skoðum hvaða mistök við gerðum. Það er ekki bara við strákana að sakast. Við erum í þessu saman."
Sjáðu viðtalið í heild sinni í sjónvarpinu hér að ofan.
Athugasemdir