Hörður Björgvin Magnússon við undirskrift í dag
Hörður Björgvin Magnússon, leikmaður Juventus á Ítalíu, skrifaði nú rétt í þessu undir eins árs lánssamning við ítalska úrvalsdeildarfélagið AC Cesena en þetta staðfesti hann við Fótbolta.net.
Hörður, sem er 21 árs gamall varnarmaður, gekk til liðs við Juventus í byrjun árs 2011 á láni frá Fram áður en hann var keyptur ári síðar.
Hann gerði þá fjögurra og hálfs árs samning við ítalska meistaraliðið og æfði og spilaði með unglinga- og varaliðinu.
Síðasta sumar keypti AC Spezia í Seríu B helmingshlut í Herði og lék hann með liðinu á síðustu leiktíð þar sem hann lék 22 leiki.
Fyrr í sumar framlengdi hann samning sinn við Juventus til ársins 2018 en þó var tekið fram að hann yrði áfram hjá Spezia.
AC Cesena lagði þó fram lánstilboð í Hörð á dögunum og eftir langar og erfiðar viðræður þá keypti Juventus helmingshlut Spezia og er leikmaðurinn nú hundrað prósent í eigu Juventus.
Það var svo í dag sem hann skrifaði undir eins árs lánssamning við Cesena en hann er mættur í æfingabúðir með félaginu í Acquapartita.
Næsti leikur Cesena er gegn varaliði félagsins eftir nokkra daga en liðið mætir svo Juventus í æfingaleik þann 30. júlí næstkomandi.
Athugasemdir
