Mario Balotelli gæti orðið leikmaður Liverpool á mánudag en hann fer í seinni hluta læknisskoðun sinnar í dag. Leikmaðurinn hefur samþykkt 50% launalækkun til að ganga í raðir Liverpool frá AC Milan.
Guardian segir að Brendan Rodgers, stjóri Liverpool, hafi fundað með Balotelli og vilji fá staðfestingu á því að sóknarmaðurinn sé mættur til félagsins til að taka framförum.
Þar sem einhver óvissa er í gangi hefur Liverpool ekki lokað á Samuel Eto’o og gæti reynt að fá kamerúnska sóknarmanninn en mál Balotelli sigla í strand.
Liverpool hefur komist að samkomulagi um 16 milljóna punda kaupverð á Balotelli og viðræður við umboðsmann hans gengu vel þar sem leikmaðurinn fær 80 þúsund pund í vikulaun ef gengið verður frá kaupunum. Launatölur hans gætu hækkað samhliða góðri hegðun og frammistöðu á vellinum.
Balotelli er mjög umdeildur og hefur lent upp á kant við knattspyrnustjóra sína í fortíðinni en vandræði hans utan vallar eru mjög þekkt. Brendan Rodgers vildi ekki ræða hugsanleg kaup á Balotelli á fréttamannafundi sínum í dag en hann segist ekki kaupa menn sem hann er í einhverjum vafa um.
Athugasemdir