„Tilfinningin var skelfileg," sagði Jón Þór í útvarpsþættinum Fótbolti.net þegar hann var spurður að því hvernig tilfinningin hafi verið að falla í sófanum ef svo má að orði komast.

„Maður var ekki sérstaklega undir þetta búinn. Ég taldi að FH myndi klára þennan leik. Það var vægast sagt skelfileg tilfinning að upplifa þetta heima hjá sér. Maður vill miklu frekar upplifa þetta eftir tapleik og geta öskrað á liðsfélagana eða kennt dómaranum um. Maður vill ekki taka útrásina í faðmi fjölskyldunnar, með börnum og eiginkonu. Það var ekkert spes."

Jón Þór segir að erfiðasta stundin fyrir sig persónulega í sumar hafi verið þegar hann tók við eftir að Gunnlaugur Jónsson hvarf á braut.

Skagamenn hafa marga hæfileikaríka leikmenn í sínum röðum og eru að mestu með uppalda stráka. Jón Þór býst við að liðið haldi langflestum leikmönnum sínum og segir að góður efniviður sé til staðar til að fara beint aftur upp.

„Það þarf að byggja ofan á það sem hefur verið vel gert. Þetta er í þriðja sinn á níu árum sem við föllum en ég er á því að af þessum þremur skiptum höfum við aldrei verið á betri stað með hópinn. Það má byggja á því. Það er blanda af ungum leikmönnum og reynslumeiri mönnum."

„Ef að til mín verður leitað er ég algjörlega tilbúinn í það að halda áfram. Það hafa engar formlegar viðræður farið í gang. Ég tel að verið sé að leyfa mönnum að klára sitt tímabil en geri ráð fyrir því að verið sé að vinna í þessu bak við tjöldin."

Viðtalið má heyra í spilaranum hér að ofan en þar talar Jón Þór meðal annars um áföllin sem ÍA varð fyrir í vetur og hvernig menn eru gíraðir í að klára mótið með sæmd.