„Það er sigur í dag. Þá brosum við,“ sagði Rakel Hönnudóttir fyrirliði Breiðabliks eftir 2-0 sigur á Stjörnunni. Blikar gerðu jafntefli við Stjörnuna á sama velli fyrir rétt um ári og misstu þar með af titlinum en þær náðu að hefna fyrir það í dag og tryggja sér annað sæti deildarinnar.
Lestu um leikinn: Stjarnan 0 - 2 Breiðablik
„Mér fannst þetta allt í lagi. Þetta hafði ekki það mikil áhrif á leikinn. Auðvitað væri ákjósanlegra ef það væri logn og smá úði, uppáhaldsfótboltaveðrið. En við tökum þessu. Þetta er alveg eins fyrir bæði liðin þannig að þetta hefði ekki svo mikil áhrif,“ sagði Rakel um aðstæður en það blés hraustlega framan af leik.
Blikar geta ekki aðeins glaðst yfir eigin úrslitum því önnur úrslit dagsins voru þeim einnig í hag. FH vann Val sem þýðir að 2. sætið er Breiðabliks og Grindavík vann Þór/KA svo Blikar eiga enn tölfræðilega möguleika á titlinum.
„Við vissum ekkert inná vellinum. Ég veit ekki hvort að bekkurinn var með eitthvað á hreinu. Við vorum bara að hugsa um að klára okkar og fréttum úrslitin hérna eftir leik.“
„Það eru ennþá möguleikar. Alveg þangað til að þetta er búið. Eins og við erum búin að segja eftir síðustu fimm umferðir þá förum við bara í okkar leiki til þess að vinna. Það er ekkert annað sem við getum gert. Við verðum að klára okkar leik á föstudaginn og sjá svo bara til.“
Hægt er að horfa á allt viðtalið við Rakel í spilaranum hér að ofan.
Athugasemdir