Heimild: Tékkneska knattspyrnusambandið
Karel Rada þjálfari Tékka býst við erfiðum leik gegn Íslandi en vonast þó til að heimavöllurinn geti hjálpað tékkneska liðinu að ná sigri.
„Heimaleikur gegn Íslandi sem lék á Evrópumótinu í sumar verður ekki auðvelt verkefni. Íslenska liðið er kraftmikið gæðalið. Það er baráttuglatt og vel skipulagt. Við vonumst til að heimavöllurinn hjálpi okkur í að ná í 3 stig,“ sagði Karel.
„Við viljum fá sex stig út úr leikjunum við Slóveníu og Ísland en íslenska liðið er mjög erfiður andstæðingur og þær þykja sigurstranglegri,“ sagði Karel fyrir Slóveníuleikinn sem Tékkar unnu 4-0.
Þar á undan höfðu Tékkar unnið Færeyjar 8-0 í fyrsta leik undankeppninnar og tapað naumlega fyrir Þýskalandi í leik þar sem sjálfsmark tékkneska liðsins skildi liðin að.
Eins og er sitja Tékkar á toppi 5. riðils með 6 stig og 11 mörk í plús eftir 3 leiki. Bæði Ísland og Þýskaland eru einnig með 6 stig. Ísland hefur leikið tvo leiki er með 9 mörk í plús en Þýskaland með 6 mörk í plús og hefur leikið þrjá leiki.
Athugasemdir